Modi-a'n Guwahati kal a ṭhulh

January 10-a Guwahati-a Khelo India Games hawngtu tura beisei, prime minister Narendra Modi chu he hunah hian a kal dawn lo.

All Assam Students’ Union (AASU) leh pawl hrang hrangte chuan Modi chu Assam chhunga kal lo tura an tih bakah a kal lui a nih chuan a na thei ang bera CAA vanga an lungawi lohna lantir an tum thu an lo puang tawh a ni. Khelo India Games CEO Avinash Joshi chuan, "Prime minister hi kan sawm ngei a, a kal tur thu a la tichiang lo a, tunah hian a kal thei dawn lo tih kan hre ta a ni," a ti.

December 15-17, 2019 khan India-Japan summit chu Guwahati-a neih tura ruahman niin prime minister Modi leh Japan prime minister Shinzo Abe-te tel tura tih ni zet tawh mah se, CAA duh lohna avanga buaina chhuak avangin an lo ṭhulh tawh bawk a ni.