Naga peace talk-a sorkar laipui aiawhtu thlak dawn

Naga peace talk neih meka sorkar laipui aiawhtu, RN Ravi chu thlakin, a aiah Intelligence Bureau (IB) director hlui, Askhaya Kumar Mishra ruat a ni dawn nia sawi a ni.

Mishra hi 1987 batch Indian Police Service (IPS), Rajathan cadre a ni a, kumin June thla khan a pension a, MHA ah adviser in a awm mek. Mishra bakah hian IB director Arvind Kumar pawh palai atan hian ruat tel a ni dawn bawk.

NSCN-IM lam hi RN Ravi chungah hian an lungawi vak lo a, inbiakna awmze nei tak an neihpui thei lo nia sawi a ni.

Kum 2015 khan Naga Peace Accord atan hian Framework Agreement lo ziak tawh mah se, tun thlengin inremna hi an la ziakfel thei lo a ni. NSCN-IM chuan inremna ziahfelna tura a thil phut, an state tana flag leh constitution hran an phutna chu Ravi chuan a pawmsak duh lo a, hei vang hian inremna tluantling hi an la siam thei lo , a khawtlai phah zel tih an sawi.

1976 batch IPS officer, Kerala cadre RN Ravi hi kum 2014 khan Naga peace talk-a sorkar laipui tana palai hna thawk tura ruat a ni a, kum 2019 khan Nagaland Governor-ah dah zui a ni.