Assam : Manas leh Kaziranga National Park-ah thawktu indaih lo

Assam forest division chuan state chhunga protected area-ah thawktu indaih lohna avangin harsatna an tawk mek a, a bikin Manas leh Kaziranga National Park-ah chuan frontline post ruak hnawh khah loh 450 chuang a awm mek.

State khawthlang lam, Manas National Park-ah hian post ruak 160 chuang leh, UNESCO World Heritage site Kaziranga National Park-ah hian post ruak 300 vel a awm a ni.

Conservationalist-te chuan thawktu indaih lohna hian ramngaw humhalh leh enkawlna kawngah pawh nghawng a nei nasa a, ram ngaw a chereu phah bakah ramsate pawhin an tuar niin an sawi.

Official-te chuan inthlan dawna an lo tiam tawh angin, BJP kaihhruai state sorkar chuan ṭhalai nuai khat tan hna an siam ngei an beisei tih an sawi. Forest watcher, guard, forester leh frontline employee hnawhkhat tur post 3,000 vel a awm mek a ni, an ti. Heng post ruakte hi direct recruitment hmanga hnawhkhah thuai an beisei thu an sawi bawk.