Hri leng thawh thumna atan Manipur inbuatsaih ṭha tawk : CM

Manipur chief minis­ter N Biren Singh chuan Ningania Imphal-a Jawa­harlal Nehru Institute of Medical Sciences (JNIMS) a tlawha thu a sawiah, Covid-19 hri leng thawh thumna thlen palh theiah an state chu an inbuatsaih ṭha tawk tih a sawi.

CM hian JNIMS cam­pus-a oxygen plant siam mek a endik a ni. He plant hi peihfel a nih hunah medical oxygen 2,000 KL a siamchhuak thei dawn a, July 15 aṭangin hman ṭan theih beisei a ni.

Biren Singh chuan he hospital-ah vek hian oxygen plant dang pawh peihfel ṭep a ni tawh tih sawiin, hospital complex-a hri kai enkawlna tur, khum 100 awmna ward pawh peihfel a ni tawh a ni, a ti.

CM chuan, "Hri laka kan himna tur pawimawh tak chu vaccine lak hi a ni a, a la thei chin chuan kan lak vek a ngai a ni. Hetih lai hian mi ṭhenkhat chuan vaccine chungchanga rinhlelhawm zawngin thu an thehdarh a, hei hian mi tam tak tihnualin vaccine lak an hreh phah a ni. Hetianga mipuite rilru tihel leh thu dik tawk lo thehdarh hi chin chhunzawm zel a nih chuan sorkar chuan a ṭul angin hma a la dawn a, mipuite pawhin sorkar leh police-te an dem thei lo ang," tiin a sawi.

Vaccine chu mithiam­ten an pawm leh hri lakah eng emaw chen veng thei tura rintlak a ni tih finfiah a nih avangin, mipuite pawh vaccine lak hi hlau lo turin CM chuan a ti. Vaccine hian taksaah nghawng ṭha lo a nei nia sawi chu thu belh chian dawl lo a ni, a ti.