Oxygen dinhmun chanchinbua tarlang turin Manipur sorkar hriattir

Manipur High Court chuan state sorkar hnenah oxygen an neih dan dinhmun chu mipuiten an hriat ve zel theihna turin chanchinbuah nitin tarlang ṭhin turin a hriattir.

Naresh Maimom-a'n ram chhunga hri leng meka oxygen indaih lohna a thlen chungchanga sorkar laipui leh state sorkarte laka petition a thehluh chu court chuan a ngaihtuah a ni.

Advocate general of Manipur N Kumarjit chuan tun thlengin hospital hrang hranga oxygen sypply a nih dan enfiahtu tur duan a la ni lo tih a sawi. Hemi rual hian Manipur sorkar bik chuan state oxygen management team a din tawh thu a sawi nghal a, he team hi oxygen supply a nih dan enfiah leh chhuizui ṭhin tura hman a ni mai theih thu a sawi bawk.

Court chuan dam lo oxygen mamawhte chu eng ang mi pawh ni se an mamawh ang pek zel chu sorkarin a din team chuan a ngaihven zui a ni tiin, langtlang taka thil tih a nih theihna turin an hmalak dan chu nitin chanchinbuah an tarlang zel tur a ni, a ti. Hei hian oxygen awm zat te, damdawi-in hrang hrangin nitin an mamawh dante a tichiang thei dawn bawk tiin a sawi.