Tripura-in UK-ah lamkhuang thawn chhuak

Tripura chuan Middle-east ram-ah lakhuihthei leh lemon an thawn chhuah hnuin, United Kingdom (UK)-ah lamkhuang an thawn chhuak leh.

State horticulture department director, Dr Pahni Bhusan Jamatia chuan a thawh khatna atan Ningani khan lamkhuang 350 chu rel-in Guwahati-ah phurh thlen a ni a, nimin khan New Delhi aṭangin UK-ah thawn a ni dawn

Dr Jamatia chuan Agriculture and Processed Food Products Export Development Authority (APEDA) hnen aṭangin Tripura lamkhuang hi thawn chhuak tura ngenna an dawn thu a sawi. A thawh khatna atana an thawn chhuah lamkhuang hi pum khat kg 3-4 inkarte an ni tih a sawi. "Tripura lamkhuang hi a tui bik a, hei vang hian company pawhin kan loneitute hnen aṭanga lei hi an chak a ni," a ti.

Kum 2019 khan Tripura hian Dubai leh Middle-east ram dangah lakhuithei an lo thawn chhuak tawh bawk. An state-ah hian lakhuihthei varieity pathum - Kew, Queen leh Bombay an ching a, Queen pineapple-te hi demand a sang hle niin an sawi.

Horticulture department statistic tihchhuah thar berah Tripura-ah hian ram hectare 8,800-a zauah loneitu 4,000 velin lakhuihthei hi an ching a ni.