Meghalaya CM-in oxygen plant siam enfiah

Meghalaya chief minister Conrad K Sangma chuan Ningani khan Ri-bhoi district-a Nongpoh Civil Hospital-a 150 LPM (litres per minute) oxygen plant siam chu a hmunah a enfiah.

Chief Minister chuan plant siam dante enfiahin hna thawh dan chu a lungawi thlak hle tih a sawi a, kar leh lamah hman theih beisei a nih tawh thu a sawi. He plant aṭang hian khum 25-ah high flow oxygen pek theih a ni dawn a, hei hi Covid-19 hri kai enkawlna atan pawh hman nghal a ni ang.

Oxygen plant siamna senso hi United Nations Development Programme (UNDP) in a tum niin, Tura leh Jowai-ah plant siam mek a ni bawk. Sangma chuan hmanruate pawh an dawng vek tawh a, hna thawh mek a ni tih sawiin internal piping tih a la ngai a, hei hian hun a la duh deuh dawn tih a sawi.

CM chuan Umran Niangbyrnai-a Maternity and Child Hospital-a oxygen plant siam tum chungchang pawh official-te sawipuiin, TATA Trust an be mek tih a sawi bawk. State chhung hmun hrang hranga health infrastructure thuam chak hna chu theihtawp chhuaha kalpui mek a ni, a ti.

"Hri kai an pun zel avangin kan inbuatsaih lawk reng a ngai a, Ri-bhoi district pawh state luhka pawimawh tak pakhat a nih avangin fimkhur a ngai zual a ni," tiin CM chuan a sawi. Sangma hian West Garo Hills-a Jengjal-a Cryogenic Oxygen Plant pawh a endik nghal a ni.