Nagaland: NPF in Congress thlawp dawn

Nagaland-a eptu pawl Naga People’s Front (NPF) chuan Inrinni khan  Chief Minister hlui leh Congress candidate K.L. Chishi an thlawp dawn tih a sawi. K.L. Chishi hi Nagaland Lok Sabha MP candidate zinga hausa ber niin a thil neih zawng zawng hlutzawng chu cheng vaibelchhe 36 a ni. Kum 75 mi ni tawhin, sitting MP Tokheho Yepthomi (NDPP), Hayithung Tungoe (NPP) leh Independent candidate M.M. Thromwa Konyak-te nen an inkhing dawn.

Hetihlai hian NPF MLA ṭhenkhat helte chuan NDPP candidate Yepthomi an thlawp tih an sawi thung. Nagaland-ah hian NDPP kaihhruai People’s Democratic Alliance (PDA) chuan sorkarna siam mekin, PDA hnuaiah hian Bharatiya Janata Party (BJP), Janata Dal (United) leh Indepedent member-te an tel a ni.

NPF President Shurhozelie Liezietsu chuan tun MP inthlanah chiah hian Congress MP candidate hi an thlawp dawn tih a sawi. Nagaland Chief Minister Neiphiu Rio chuan NPF in Congress an thlawp chu thil nuihzathlak tak a nih thu a sawi. NPF chuan MLA 26 lai nei chunga MLA pakhat pawh nei lo Congress an thlawp chu thil nuihzathlak tak a ni tih a sawi a ni.