Manipur BJP MP hluiin NPP zawm

Manipur BJP Member of Parliament hlui Kim Gangte chuan BJP chhuah­sanin Meghalaya Chief Minister Conrad Sangma kaihhruai National Peoples’Party (NPP) chu kar kalta Zirtawpni khan a zawm.

Kim Gangte hi Outer Manipur MP ṭhin niin, Uyungmakhong thingtlang khua, Churachandpur District mi a ni a, Nilaini liamta khan BJP Manipur president hnenah a banna hi a thehlut tawh a ni. Gangte hian party ticket pek a nih loh avang leh support group pek a neih loh vangin BJP hi a chhuahsan tih a sawi.

Party ticket chu a phu tih sawiin hmeichhe MP a nih avang pawhin a phu tih a sawi. An party thupuangtu a nih bakah mipuite nen pawh inkungkaihna ṭha tak an nei tih a sawi a ni. BJP chu hmeichhe candidate thlawp tura la inpeih loah a puh bawk a, amah chu a fiahna a nih thu a sawi a ni.

Kim Gangte hian Outer Manipur-ah hian BJP aiawha din a phut a, mah se Benjamin Mate, H Shokhopao tia hriat chu Outer Manipur-ah hian BJP aiawhin a ding ang. Gangte hian January 2017 khan Congress MLA pahnih- Nemcha Kipgen leh Vungjagin Valte-te rual­in BJP hi a zawm a ni.