Manipur zirlai pawl Hruaitu man NESO in dem

North East Students’ Organisation (NESO) chuan Zirtawpni-a Manipur students union hruaitu, Thokchom Veewon man a ni chu an dem thu an sawi.

NESO chuan intiamkamna awmloa chhuah  nghal a nih loh chuan an ngawi mai mai dawn lo tih an sawi.

Manipur Students’ Association of Delhi (MSAD) president hlui Thokchom Veewon hi Zirtawpni khan Manipur Police leh Delhi police ṭangkawpte chuan South Delhi-a Saket-a a in luahah an man a, sorkar pawisawiah an puh vangin an man a ni.

NESO chuan hei hi an dem thu sawiin arrest warrant nei lo leh chhan awm loa manah Police-te chu an puh a, Inrinni-a thuchhuah an siamah Manipur Journalist Kishorechandra Wangkhem man a nih chungchangah leh Citizenship Amendment Bill, 2016 chungchangah duh lohna a auchhuahpui mai niin an sawi.

Veemon chu police-te chuan kut an thlak nasa hle tih sawiin, a chenna aṭanga an man dawn pawhin a slipper pawh buntir an phal lo tih NESO chuan an sawi a, a laptop leh mobile phone-te pawh ruksak an nih thu an sawi a ni. 

Man a nih dan chu democracy kalh a nih thu sawiin, Manipur police-te chu ni tam vak lo liamtaah khan Manipur-a Veewon-a chenna inah kalin a chhungte pawh an vau nia tarlan a ni bawk.

Veewon hi Janakpuri Police station-ah hren mek a ni a, Manipur panpui thuai a nih rin a ni.