Assam Governor-in Dibrugarh University VC a suspend

Assam governor Jagdish Mukhi chuan Dibrugarh University vice-chancellor Ranjit Tamuli chu Ningani khan a suspend. 

Governor hian fact-finding committee-in VC hi a thuneihna dik lo taka hmangah leh, vice-chancellor a nihna anga a hna thawh turte dah pawimawh tawk lo nia report an thehluh benchhanin, a hna aṭang hian a suspend a ni. 

VC suspend a nih avangin he university-a professor senior ber, Department of life sciences-a mi, Prof RNS Yadav chu Dibrugarh University Act, 1965-a Section 10 (5) hnuaiah vice-chancellor post hi chelh lailawk tura ruat nghal a ni. Hei hi dan pangngai anga university a kal chhunzawm theihna atan leh, zirlaiten harsatna an tawh lohna tura tih a nih thu Raj Bhavan thuchhuah chuan a tarlang. 

Dibrugarh University Teachers’ Association, Dibrugarh University Officers’ Association, Dibrugarh University Employees’ Association leh Lowal bial MLA Rituparna Baruah-te chuan Tamuli hnuaiah university fund-te tihchingpen nia sawiin Governor, University Chancellor ni bawk hnenah petition an lo thehlut tawh a ni. 

Governor hian an puhna chungchangah Prof Ranjit Tamuli hi insawifiah turin a ti a, mahse a insawifiahna dan chu lungawi thlak loh avangin thil awmdan chhui chiang turin fact-finding committee a din a, Assam sorkar hnuaia commissioner and secretary (higher education department)  chu chairman atan dah a ni. Committee-in thil awmdan a chhuina report a thehluh hnuah, Govenor chuan Prof Tamuli chuan thil a ti dik lo ngei nia sawiin suspend nghal a nih thu Ningani khan a sawi ta a ni.