Manipur: Hmeichhe bazar-a thil zuarte leh police innawr buai

Manipur khawpui Imphal-a Ima (women) Market (hmeichhe bazar)-a thil zuarte chuan Thawhṭanni khan hmei­chhe naupang kum 12 mi, a hostel room-a thia chharin rorelna dik a hmuh theih nan kawng zawh an tum a, police-ten lo dangin an innawrbuai nasa hle.

Ima Market-a hmei­chhiate hian Standard Robarth Higher Secon­dary School principal fapa Imphal West chief judicial magistrate court-a hruai a nihna hmun- Cheirap Court Complex thleng kawngzawh an tum a ni. Mahse police-te chuan hei hi hre lawkin Cheirap Court Complex hi uluk takin an veng nghal a, kawgzawhte hi tear gas leh mock bomb hmangin an lo hnawt darh a ni. 

Ima Market leh Chei­rap Court Complex hi metre 200 vel leka inhlat a ni a, hemi a nih avang hian police-te pawh hian court hi an veng uluk hle. Hmeichhe naupang thihna chung­changah hian principal fapa naupang ber hi man a ni a, ni sarih chhung police-ten an kawl hnuah Thawhṭanni khan Court-ah hian hruai a ni. Ani bakah hian principal Ph Landhoni leh coordinator Ph Romita Dev-te pawh man an ni bawk a, anni pahnih pawh hi police kutah an la awm mek.