BPF MP-in Bodoland tan UT dil

Sorkar laipuiin Jammu and Kashmir hnena special status pekna, Article 370 ṭhiah a, J&K state chu union territory pahniha a ṭhensak hnuah, Assam-a Bodoland People's Front (BPF) MP Biswajeet Daimary chuan Bodoland tana UT pe turin sorkar a phut ve nghal. 

Rajya Sabha MP chuan Bodoland-in a hma aṭanga state hran an ngiat reng thu sawiin, Bhutan hnaih leh China ramri bula awm a nih avangin, UT pek a nih chuan sorkar laipui chuan border area aṭangin China chetdan a thlithlai reng thei dawn a ni, a ti. 

"Hmarchhakah hnam hrang hrang, state hran pek ngiat an awm a ni. Ṭhenkhat chu Sixth schedule status pek an ni a, mahse hei hian mipuite chu a tilungawi chuang lo," tiin Daimary chuan a sawi. Constitution-a Article 244A chuan automonous state status pek theihna thuneihna a pe a, hei vang hian home minister chu Bodoland tana he article hi hmang turin a phut a ni. Hemi rual hian sorkar laipuiin Jammu and Kashmir chungchanga thutlukna a siam chu a thlawp thu a sawi a, J&K state chhung dinhmun chu a ṭha tawh lo hle a, thunun theih lohin a awm tawh a ni, a ti.