KHADC-in Khanapara-a transit camp siam duh lo

Khasi Hills Autonomous District Council (KHADC) chuan Assam State Transport Corporation transit camp sakna, Khanapara chu Meghalaya ram chhung a ni tih sawiin, transit camp siam hi dan kalh a ni tih an sawi. 

KHADC chief executive member (CEM) Titostarwell Chyne chuan Meghalaya ram chhunga Assam sorkarin dan kalha camp a siam chu titawp nghal tura an phut thu sawiin, nikum December 23 khan Kamrup district deputy commissioner hnenah  pawh ngenna hi ziaka a thehluh thu a sawi a ni. 

Meghalaya chief secretary leh Ri-bhoi district DC hnenah dan kalha transit camp siam mek lo dang tura a ṭul anga hma la turin an ngen bawk. Meghalaya leh Assam hi ramri chungchangah hmun 12-ah buaina a nei a, heng hmunte hi state pahnihte hian an ram chin zawk niin an chhal ve ve a ni. State pahnihte hian ramri buaina chungchang chinfel dan ngaihtuahtu tur committee pawh an din tawh a, chief secretary-level meeting pawh nei fo tawh mah se tun thlengin inremna an la nei thei lo.