International Short Film Festival-ah Naga film chhuah dawn
France rama Clermont-Ferrand International Short Film Festival neih turah Nagaland short film, 'Angh' chu chhuah tur zingah thlan tel a ni. He festival-a Indian film thlan awmchhun a ni bawk.
Fictional film, Angh hi Nagaland mi Theja Rio leh Nancy Nisa Beso-te produce a ni a, kum 2019 April thlaa an siam a ni. A film hi kum 1963 hunlai, Nagaland-a thingtlang khaw pakhata pafa chanchin, an khuaa Kristian sakhuaa inlet hnuhnung berte chanchin leh, an sakhaw hmasa leh kalphunga vawn nun tuma an beih dan chungchang a ni. He film hi Kodak Super 16mm hmanga siam a ni a, hei hi film siamna atan hman zen zen a ni tawh lo. A changtute pawh lemchan lama hnuhma la nei ngai lote an ni. Angh hi minute 22-a thui a ni.
Clermont-Ferrand International Short Film Festival hi Cannes dawta France rama film festival lian ber dawttua sawi a ni a, Oscar-qualifying festival a ni tel bawk. Kuminah January 29 - February 6 chhungin festival hi neih ṭum a ni.