Assam Assembly Election 2021 NRC-a tel lo pawhin vote an thlak thei dawn
Election Commission of India (ECI) chuan kumina Assam assembly inthlan neih turah National Register of Citizens (NRC) list-a tel lo, mahse voters' list-a tel te chuan vote an thlak thei dawn tho tih a sawi.
Assam-a NRC list-ah hian hming 3,11,21,004 tarlan a ni a, hetih lai hian diltu zinga mi 19,06,657 te erawh telh an ni lo thung. Chief election commissioner (CEC) Sunil Arora chuan Guwahati-a chanchinthar lakhawmtute a kawmnaah hei hi sawiin, inthlan neih hun tur chu Bihu festival leh CBSE board exam nena insu buai lo tura ruat tum a nih tih a sawi bawk. Arora kaihhruaiin Election Commission team hian inthlan neih tur atana inbuatsaih dante thlirin ni thum chamin Assam hi an tlawh a ni.
CEC chuan Covid-19 hripui leng mek avangin inthlan neih turah pawh fimkhur a ṭul thu a sawi a, social distancing dante zawm ṭhat a nih theihna turin polling station pakhata elector awm thei zat pawh 1,500 aṭangin 1,000-ah tihtlem a nih thu a sawi. Hei vang hian polling station hi 5,000 vel siam belh a ngai dawn niin a sawi.