
Sikkim: Kum 2028-ah rel kawng peihfel tum
Sikkim-a rel kawng hmasa ber tur, km 44.96-a thui Sivok-Rangpo New Railway Line project chu kum 2028 June thlaah peihfel hman beisei a ni tih official-ten an sawi. Northeast Frontier Railway (NFR) chief public relations officer (CPRO) Kapinjal Kishore Sharma chuan, NFR general manager (consctruction) Ashish Bansal leh sikkim chief minister, Prem Singh Tamang-ten Gangtok-ah Thawhlehi khan meeting an nei tih a sawi.
Meeting-ah hian parliament member Indra Hang Subba leh state chief secretary Ravindra Telang-te pawh an tel a, rel infrastructure thawh mek hmasawnnate an sawi ho a ni. Chief Minister hoa meeting-ah hian Bansal chuan, Sivok-Rangpo New Railway Line Project hmasawnnate a hrilh a, chung zingah chuan rel kawng siam hna kalpui mek dan leh, chak zawka thawh a nih dante a tel. Hei bakah Rangpo-Saramsa leh Meli-Dentam survey kalpuidan a hrilh bawk.
Km 44. 96-a thui Sivok-Rangpo New Railway Line Project hi, Sikkim kalpawhna tura rel kawng hmasa ber a ni tih CPRO Sharma chuan a sawi. Project-ah hian a hmunhmain a zir loh avanga harsatna an tawhte a sawilang bawk a; tunnel 14, lei lian tham 13 leh, lei tenau 10 dawh a nih thu a sawi. Peihfel a nih hunah Sikkim kalpawhna a tichangtlung dawn a, passenger-te veivah a tih awlsam dawn bakah, tourism a thuam chak dawn a ni.