Nagaland: TUMO creative technologies centre din dawn

Nagaland chuan Investment & Development Authority of Nagaland (IDAN) leh, Parinda Creative Technology Centre (PCTC) te nen thawh dunna tur inremna Memorandum of Understanding (MoU) ziakin, hmarchhak biala a hmasa ber leh ram chhunga a pahnihna tur, TUMO Centre for Creative Technologies an din dawn. TUMO Center for Creative Technologies hi zirlaite tan a thlawna zirna program kalpuina tur a ni.

MoU hi IDAN chairman, Abu Metha hriatpuinain Integrated Business Hub and Innovation Centre (IBH&IC), Dimapur-a centre dinna tur atana ziah a ni. Inremna thuthlung ziahnaah hian TUMO chief executive officer, Marie Lou Papazian; chief development officer, Pegor Hratch Papazian; leh regional director Kabir Sethi te an tel. Abu Metha chuan he hmalakna hi lawmawm a tih thu a sawi a, state sorkarin Naga ṭhangthar lo awm zel turte tana hun remchang siamsakna, inbuatsaih leh khawvel puma hruaitu nihna an chelh theihna tura a ruahmanna a nih thu a sawi.

Marie Lou Papazian chuan ṭhalaiten zirna ṭha an dawn theihna tur inang tlang pek an phu thu leh, creative technology zirna chu huang zauh zel a pawimawh thu a sawi. Ṭhalaiten an thiam leh theihna an hmuh chhuah theihna tura hun remchang siamsakna a ni tih a sawi bawk. Centre hi NagaEd thawhpuinaa din tur a ni a, zirlai kum 12 aṭanga kum 18 inkar tan kalpui a ni ang. Zirlaite chuan artificial intelligence, programming, web siam, robotic, game siam, animation, 3D modelling, music, drawing, graphic design leh writing an zir thei dawn a ni.