Assam: Lirthei chetsualna 15% in a pung

Assam-ah lirthei chetsualna 15% a a pun avangin state pumah traffic inkaihhruaina chak zawka kalpui tura hma lak mek a ni tih chief minister Himanta Biswa Sarma chuan November 18 khan a sawi.

CM Sarma-a'n X-a thuchhuah a siamah, lirthei chetsualna chu tlai lam dar 6 aṭanga zan dar 9 inkarah a thleng nasa tih a sawi a, hemi hun chhung hian khauh zawka lirthei tlan endikna neih a ni dawn tih a tarlang. Transport Department leh Assam Police ṭangkawpin enforcement campaign an kalpui mek a; lirthei fitness uluk zawka endik a ni dawn a, driver-te an fimkhur theihna tur leh lirthei hmanga veivakte him theihna atan chetsualna tihtlem tum a nih thu a sawi.

Sarma chuan campaign hi nakkum January 15 thleng kalpui a ni dawn tih a sawi. Sorkar chuan campaign in rahṭha a chhuah leh chhuah loh a en thlithlai dawn tih a sawi bawk. Endikna nasa zawka kalpui a nih chhan chu state-ah lirthei chetsualna a pun vang a nih thu a sawi a ni.