Manipur: State puma shutdown puanin nunphung tibuai

Manipur-a Naga-te chen tamna hmun, New Heaven-a tun hnaia Tangkhul Naga mi pali thah an nih avanga Native People's Committee, Manipur (NPCM) in Thawhṭannia state pum huapa darkar 24 chhung shutdown an puan chuan nunphung a tibuai hle. Shutdown hi valley district leh Naga-te chen tamna hmunah puan a ni a; dawr leh sumdawnna hmunte khar an ni.

Shutdown puan lai hian Imphal-a Chingmeirong-ah bandh thlawptute leh, police-te inkarah buaina nasa tak a chhuak a ni. NPCM volunteer-te chuan police-ten an megaphone an tichhia niin an puh a, an intibuai zui a ni. Hemi hnuah security force-te chuan tear gas leh mob bomb hmangin lungawi lohna lantirtute an hnawtdarh bawk. Shutdown thlawptu hmeichhei tam tak chu Kwakeithel Bazaar-ah an pungkhawm bawk.

Ukhrul, Kamjong leh Chandel district headquarter-ah pawh shutdown puan a ni a, dawr leh sumdawnna hmun khar vek an ni. NCPM hian November 15 aṭanga November 16 zanlai thleng khan shutdown hi an puang a ni. Tlang leh valley district-a cheng civil society pawl hrang hrangte chuan Naga civil mi thah an ni chu na taka an dem thu leh, a rang lama rorelna dik a thlen an phut. Shutdown-ah hian sumdawnna, dawr, market, private office leh zirna inte khar a ni a; medical service, ambulance, kangṭhelhtu, tui supply, electric leh media mite a huam lo thung.