Meghalaya: CM-in MeghGo tlangzarh

Meghalaya chief minister Conrad K Sangma chuan November 17 khan state-a sorkar enkawl, integrated mobility application hmasa ber MeghGo a tlangzarh. He thil hi transport service hrang hrang digital platform pakhata dahkhawmna tur a ni a, khawtlang mipui leh khualzinte tan inkalpawhna tihchangtlun tumna a ni bawk. Chief Minister chuan tualchhung mipuite leh khualzinte chu he app hi hmang ṭangkai turin a ngen.

CM Sangma chuan he application hi taxi-booking service pangngai aia ṭha zawk a nih tur thu leh, lirthei chi hrang hrang hman theihna tur system inzawmkhawmna a nih thu a sawi. He hmalakna hmang hian taxi operator leh state-a transport sector-a thawk mi dangte tan hun remchang ṭha zawk a siam beisei a ni. Platform hi state puma hman theih tura ruahman a ni a, transport kaihhnawih service hrang hrangte chu application pakhat hnuaia dahkhawm tum a ni. Hei hi state sorkarin technology hmanga mobility network siam tura hma a lakna zinga mi a ni.

Chief Minister pawhin he application hi Bah Nang-a hawnna programme a telpui zawhah a hman thu a sawi. He app hian state-a transport network zingah taxi, shared taxi, bus leh helicopter booking service atan a hman theih dawn a, service dangte pawh kalpui chhoh zel tum a ni bawk. Platform hi tualchhung taxi operator-te'n sorkar enkawl ni lo, taxi leh motor koh/hawh theihna company-ten commission an lak chungchanga harsatna an tawh sutkian tumna a ni bawk. Sorkar chuan he system hmang hian transport operator-ten an sum lak luh aṭanga a tam zawk an humhim thei dawn tih an sawi.