
Assam: CM hoin lirthei chetsual laka invenna kalpui dan thlirlet
Assam-a Kaziranga bula lirthei chetsualnaa mi 26 an thih hnuah, chief minister Himanta Biswa Sarma hoin Pathianni, November 15 khan video conference hmangin department hrang hranga sorkar official-te chuan meeting an nei a, lirthei chetsual laka invenna leh, chetsualna a thlen chhunzawm zel lohna tura invenna kalpui dante endik a ni.
Meeting hi video conference hmanga neih a ni a; District Commissioner, Police Superintendent, District Transport Officer-te leh Excise Superintendent-te an tel. He hunah hian state puma lirthei chetsualna venna tur leh, chetsualna laka invendan tur sawi ho a ni. Video conference-ah hian Chief Minister chuan state puma lirthei chetsualna thleng ṭhin tihtawpna tura hmalakna tur hrang hrang a tichhuak bawk a, heng zingah hian rui chunga lirthei khalhte leh, lirthei khalh chakte laka hremna na tak pekna pawh a tel. Hei bakah district-level task force kaltlanga enzuina khauh zawk kalpui a tel bawk.
Supreme Court thupek angin, district tinah road safety task force din a ni dawn a, sorkar chuan district-level Zero-Fatality Programme a kalpui bawk dawn a ni. Lirthei ke pahnih nei khalhten helmet an khum ngei ngei tur a ni a, tlailam dar 3 aṭanga zan dar 9 thleng lirthei tlan chak theih chin pel, duhdah taka lirthei khalh leh rui chunga lirthei khalh an awm leh awm loh uluk taka endik a ni dawn. Sorkar chuan traffic dan bawhchhiate lakah hremna pek an ni dawn tih sawiin, dan bawhchhe nawn fote chu driving licence tihtawp sak an ni ang.