Manipur: Naga mi 6 thahte ni 187 hnuah phum

Manipur-a Liangmai Naga mi paruk, kumin May 13-a rukbo an nih hnua an ruang chhar, Imphal-a Jawaharlal Nehru Institute of Medical Sciences (JNIMS) mitthi dahna hmuna dahte chu ni 187 hnuah nimin November 16, Thawhṭanni khan Konsakhul khuaa Naga Martyr Park-ah phum an ni. Ruangte hi volunteer leh civil society pawl hrang hrang aiawhte telpuinain an chhungte kutah hlan an ni.

United Naga Council (UNC), Manipur sorkar aiawh leh Union Home Ministry-ten inbiakna an neih hnuah ruang hi lak chhuah leh an chhungte kutah hlan an ni. Khawtlang hruaitu Timothy Wijunamai chuan ruang phum tura inremna hi September 26-a Guwahati-a meeting neihah siam a ni tih a sawi. Mitthi parukte hi Kangpokpi district-a Konsakhul khuaa cheng an ni a, May 13 aṭang khan an awmna chin hriat a ni loa, Leilon Vaiphei Kuki khua aṭangin Kuki helpawl nia rinhlelhten an rubo nia sawi a ni.

Security force-ten zawn beihpui an thlak hnuah, an bo aṭanga kar li liam hnu June 10 khan an ruang nasa taka sawisak chu Leilon Vaiphei leh Kharam Vaiphei khaw inkarah hmuh an ni. Mitthite hi Rev Manu Thiumai, Pastor Kenpibou Chawang, Kaliwangbou Abonmai, Dilip Thiumai, Phenrilung Chawang leh Phenrongwi Thiumai-te an ni. An ruang hi phum ni mah se, mitthi chhungte chuan rorelna dik an phutna chu tihhlawhtlin a la ni lo tih an sawi.