Arunachal: Kurung Kumey district-a kangmei chhuakah mi 4 an thi

Arunachal Pradesh-a Kurung Kumey district-ah nimin, Ningani khan kangmei nasa tak chhuakin mi pali an thi a, chenna in 24 vel a kang kai tih official-ten an sawi. Mitthite hi hmeichhe pakhat leh a fate pathum an ni a, an chhungkaw pa ber hi a awmna chin hriat a la ni lo a, thi zat pawh awm belh thei nia rin a nih thu deputy commissioner Cheechung Chukhu chuan a sawi.

Kangmei hi Parsi-Parlo khuaa zing dar 2:30 vela chhuak a ni a, chenna in 19 a kan ral bakah panga chu a kang chhe nasa hle tih District Disaster Management Officer chuan a sawi. Kangmei chhuah chhan hi hriat chian a la ni lo a, chhuizuina an neih hnuah choka aṭanga chhuak a nih rin a ni. Hliam zat pawh an awm belh rin niin, kangmeiin bungrua a tihchhiat pawh chhut theih a la ni lo. Koloriang-a district headquarters-a official team-te chu a hmunah kalin, chhan chhuah leh chhawmdawl hna an thawk nghal a ni.

Parsi-Parlo-ah hian kangmei chhuaka a ṭhelhna tur facility an neih ṭha tawk lo a, fire station chu an nei a, mahse an khua aṭanga km 38-a hla Koloriang-ah fire tender a awm avangin a hun takah kangṭhelthelhtute pawh an thleng hman lo a ni. Kangmei ṭhelhna hmanrua an neih ṭhat loh avangin a kang kai chak hle nia sawi a ni bawk. Chief minister Pema Khandu chuan tualchhung mite a tawrhpui thu sawiin, tualchhung administration, police, fire service, chhan chhuah hna thawktu, volunteer-te leh tualchhung mipuite inpekna a fak. Kangmeiin a nghawng chhungkuate chhawmdawlna pek an ni dawn tih a sawi bawk.