Tripura: CM-in state sorkar leh TTAADC thawh hona ṭha neih phut

Tripura chief minister Manik Saha chuan Thawhlehni khan, state sorkar leh Tripura Tribal Areas Autonomous District Council (TTAADC) inkarah inremna, inrintawnna leh inbiakna ṭha neih a phut thu sawiin, thawh hona ṭha tel loin hmasawnna a kalpui theih loh tih a sawi.

Khumulwng-a NUAI Auditorium-a TTAADC executive member tharte lak luhna inkhawma thu a sawiah, Chief Minister chuan member tharte chu tribal huam chhunga mipuite khawsak chawikan kawnga lungrual taka hna thawk tur leh, autonomous council-a langtlang, rintlak leh inrelbawlna felfai nei turin a chah. Programme-ah hian Lok Sabha MP Kriti Singh Debbarman leh mi pawimawh eng emaw zat an tel.

CM Saha chuan executive member tharte a lawmpui thu a sawi rualin, tribal hotute chu state sorkar nen thawh hona ṭha nei turin a ngen a, inrintawnna leh inbiakna mumal leh ṭha neih chuan harsatna leh inhriatthiam loh tawnna thleng thei lakah a veng thei a ni, a ti. Sorkar chuan inrem lohnate chu inṭhen darhna atana hman aiin, inbiakna hmanga buaina chinfel a duh zawk tih a sawi bawk. Sixth Schedule pawimawhna tarlangin, Chief Minister chuan tribal-te ram, ṭawng, hnam ziarang, kalphung leh socio-economic interest vawnhimna atan a pawimawh thu a sawi.