Assam: Oil facility puaka thi mi 4 tling tawh

Assam-a Dibrugarh district-a Tengakhat hmuna Zirtawpni, November 6-a Tengakhat-a OIL Intermediate tank farm (ITF) puaka thi zat mi pali an tling tawh. Hliam tuar pakhat chu Pathianni November 8 khan a hliam tuar loin a thi ve leh a ni. Hliam tuar dang pathumte pawh damdawi-inah enkawl mek an ni a, an dinhmun a ṭha lo hle. Hliam tuar leh thite hi Spectron Engineering Private Limited hnuaia hnathawk an ni.

OIL chuan thil thleng chhuizui tur high-level inquiry a din tawh bawk. Committee chuan OIL hnuaia thawk, ITF in-charge pali a suspend a, an zingah hian officer pathum an tel. Chhui chianna neih zawh a nih hma chuan an hna aṭangin chawlhtir an ni dawn tih official chuan a sawi.

PSU chuan chhiatna thleng vanga thi chhungte hnenah zangnadawmna Rs nuai 10 ṭheuh pek an ni dawn tih sawiin, hliam tuarte Rs nuai 5 pek an ni bawk ang. Union minister Sarbananda Sonowal leh chief minister Himanta Biswa Sarma-te chuan uluk taka an thlithlai reng thu Inrinni khan thuchhuah siamin an tarlang.

ITF hi petroleum product thawn chhuah a nih hmaa tank-a dah lailawkna hmun a ni. Zirtawpni liam ta khan a puah hnuah kangmei nasa tak a chhuak zui a ni.