Manipur: AI-a thuam career guidance hub hawng

Hmarchhak biala a hmasa ber tur, AI-a thuam career intelligence hub chu Manipur chief minister Yumnam Khemchand Singh chuan Inrinni khan Imphal-a Tamphasana Girls Higher Secondary School-ah a hawng. Hemi hmang hian zirlaite technology lama thiamna pek tum niin, career guidance, counselling leh hnathawh tur an hmuh theihna kawngah a pui dawn a ni.

State sorkar tarlan danin, hub hi Members of Parliament Local Area Development Scheme hnuaia din a ni a, hmarchhak biala a hmasa ber a ni. Hawnna inkhawma thu a sawiah, Singh chuan artificial intelligence ṭhanglian zel chungchang sawilangin, technology chuan field leh thiamna hrang hrangah nasa takin hmasawnna a thlen tawh thu a sawi. Hub thar chuan zirlaite chu an theihna neihah a pui dawn a, hnathawh tur an hmuh theihna tur leh, hma huna an inbuatsaihnaah a pui dawn tih a sawi.

Chief Minister chuan Rajya Sabha member A Sharda Devi, Education department leh sikul faculty member-te chu he hmalaknaa thlawpna an pek ṭhat avangin lawmthu a hrilh. CM chuan thla riat liam taa state chhung buainaa lungawi lohna lantirtute zinga an tel loh avangin lawmthu a hrilh bawk. An rilru puitlinna chu fakin, zirna leh an hma hun turah insawrbing turin a fuih bawk. Zirlaite chu tualchhung buainaa tharum thawhtu zinga tel lo chhunzawm zel tur leh, remna leh muanna vawng nung turin a chah a ni.