Manipur: Naga pawlin kawngzawh buatsaih

Manipur-a Ukhrul district-ah nimin November 5, Ningani khan Naga pawl hrang hrangte chuan state-a buaina chhuak mek duh lohna lantirin kawngzawh an huaihawt a, sorkar laipui chu hunrei tak tualchhunga buaina awm tawh titawp turin an phut. Kawngzawh hi United Naga Council (UNC) hnuaiah Tangkhul Naga Long (TNL) leh Tangkhul Frontal Organisation buatsaih a ni.

Ukhrul district-ah hmun pahnih - Dungrei Junction leh Mission Ground-ah mipui an pungkhawm a, Ukhrul Headquarters Ground lam panin kawng an zawh a ni. Lungawi lohna lantirna hian nunphung a tibuai hle a, dawr, mimal institution leh public tranport-te pawh tihtawp lailawk a ni. Lungawi lohna lantirtute chuan state-a buaina chhuak mek leh, ralthuam keng pawl awmte duh lohna thuziakte an keng.

Thuziak an pholan zingah Naga bial aṭanga Assam Rifle-te chhuah tir, Kuki helpawlte ralthuam pek an ni tih sawi thawm awm tihtawp, Suspension of Operations (SoO) agreement ṭhiah leh Kuki firfiak pawlte chu helpawla puante a tel. Lungawi lohna lantirtute hian Kuki raltlante an rama haw tir an phut bakah, dan loa Kuki pem lut nia sawite thawn chhuah an phut bawk. Hei bakah deputy chief minister aṭanga Nemcha Kipgen paihthlak an phut tih an tarlang bawk.

Pungkhawm hmaa thu a sawiah, Tangkhul Katamnao Saklong (TKS) president Ramreichan Keishing chuan Assam Rifle-te chu ṭan lam nei nia sawiin, Naga-te tana inhumhimna an nih loh chuan chhuah tir an phut thu leh, an thil phutte ngaihsak a nih loh chuan lungawi lohna lantir chhunzawm zel a nih tur thu a sawi. Lungawi lohna lantirna hi Kamjong district-ah pawh neih a ni.