Sikkim: Kum 10 chhungin bawnghnute siam chhuah 79% in a pung

Sorkar laipuia fisheries, animal Husbandry and dairying minister, Rajiv Ranjan Singh chuan kum 10 liam ta chhungin Sikkim-ah nitina bawnghnute leh a kaihhnawih siam chhuah 79% in a pung tih a sawi a, kum 2014-15-a litre nuai 1.37 siam chhuah aṭangin kum 2025-26-ah litre nuai 2.45-ah a kai chho tih Thawhlehni khan a sawi.

Tadong-a Sikkim Co-operative Milk Producers' Union Limited a tlawhnaah, Union Minister chuan dairy sector-a state hmasawnna a tarlang a, cooperative institution, ran vulh hmanga bawnghnute tihpun leh loneitute sum lak luh tihpunna atan infrastructure huang zauh a pawimawh thu a sawi. Sikkim-a dairy cooperative society awm zat chu kum 2014-15-a 389 aṭangin kum 2025-26-ah 733-ah a pung tih a sawi. Bawngvulha eizawng pawh hemi hun chhung hian 10,000 vel aṭangin 16,000-ah an pung tih a sawi bawk.Bawnghnute hralh chhuah nasa takin a pung a, ni khata litre 17,000 hralh chhuah ṭhin chu litre 61,000-ah a kai chho a ni.

Singh chuan India chu khawvel puma bawnghnute siam chhuaktu lian ber a nih thu leh, dairy farmer-te thuam chak chu a ngaih pawimawh thu a sawi a, a bikin hmarchhak biala thingtlang khawsak chawikanna atan a pawimawh thu a sawi. Singh hian Sikkim Milk Union Processing Plant-a Microbiology Laboratory a hawng bawk a, bawnghnute hmanga thil siamte pholanna exhibition stall a tlawh bakah, cooperative-in hmalakna a neihte a endik bawk.