Assam: Guwahati hotel-a mi kaphlumtu nia rinhlelh police-ten kaphlum

Guwahati-a Hotel Bilas Inn-a October 26-a mi panga kaphlumtu nia rinhlelh, kum 34 mi Ghanakanta Gogoi chu Nilaini zing khan bank loan thubuaia custody-a hruai a nih hnuah, Assam-a Sivasagar district-ah police-ten an kaphlum. Gogoi hi kum 10 liam taa bank loan thubuai a neih chhuizuina nei turin Sivasagar police-te chuan an hruai a ni.

Police-te chuan Gogoi hian investigating officer, SI Debashish Sharma service revolver chhuhsak a tumna lamah silai hi vawi thum a puak tih an sawi. He thil thlengah hian officer pakhat pawhin hliam na tak a tuar bawk. Sivasagar police superintendent Papori Chetia chuan Gogoi tlan chhuak tur leh, silai hmanga pawi a khawih tur venna atan silai a hmetpuak tih a sawi. Gogoi hi Sivasagar Civil Hospital-ah rang taka hruai a nih hnuah a thi tih doctor-te chuan an puang.

Thawhlehni khan Guwahati court chuan Gogoi hi hotel inkahna avanga ni sarih chhung police hrenna hnuaia a awm hnuah judicial custody-ah a thawn a, Sivasagar police-te chuan bank loan hmanga inbumna thubuaiah an hruai a ni. Assam police-te chuan hotel-a inkahna thleng chhuizui turin Special Investigating Team (SIT) an din a, SIT-ten Gogoi-a'n .32-bore pistol a neih theih dan an chhuizuinaah, silai hi kum 2024 October thla khan Nagaland-a Dimapur-ah Rs nuai 3 in a lei tih an hrechhuak tawh bawk.