Meghalaya: World Bank transport project zo fel

Meghalaya chuan World Bank bultuma Integrated Transport Project thawh chu a zo fel a, kawng km 330-a thui an siam chu mipui nuai riat velin an chhawr ṭangkai thei dawn a, inkalpawhna ṭha zawk a awm tawh dawn a ni. Meghalaya Integrated Transport Project hi kum 2020 khan kalpui ṭan a ni a, district hrang hranga kawng siam leh transport sector thuam chakna niin, kumin October 31 khan zawh fel a ni.

World Bank-a Implementation Status leh Result report chuan November 2 khan he project hnuaia hnathawh zawng zawng thawh zawh a ni tih a tarlang. Hna thawh zingah hian civil work, consultancy zirchianna leh, kum 2022 June thlaa tuilianin kawng a tihchhiat siamṭhatte pawh a tel. Report tarlan danin, Meghalaya-a mipui 20%, mi 7,99,477 velin he kawng siamṭhat hi an chhawr ṭangkai dawn a ni. He hmalakna hi Meghalaya Infrastructure Development Finance Corporation kaltlanga thawh a ni a, kawng siamnaah hian Public Works department chuan chanvo pawimawh tak a nei bawk.

Project-ah hian hmun hla leh tlawhpawh harsate awlsam zawka kal theihna tur kawng km 338.54 siam a ni a, project hmang hian zin veivah hun chhung 39.06% velin a titlem dawn bawk. Zin veivahnaa sum sen a titlem dawn a, mipui, sumdawng leh loneituten an chhawr ṭangkai bawk dawn a ni. Meghalaya-ah hian ruahtui tlak avanga leimin leh tuilian a thlen nasat ṭhin avangin, he project hian chhiatna thleng ṭhin venna atan infrastructure a thuam chak bawk a ni. Department chuan lei 20 dawh turin ruahmanna a siam tawh bawk a, he project hi thawh thuai a ni ang.