Tripura: BSF beitu mi 9 man

Tripura-a Sepahlijala district-a India leh Bangladesh ramri bula Ashabari khuaa BSF-te beih leh an silai ruksak tum nia puh mi 9 man an ni a, an zingah hmeichhia pathum an tel. He beihna thlenga hian Company Commander chuan hliam a tuar a ni.

Police thuchhuah chuan he thil hi BSF-te'n tualchhung mi pakhat, ruihhlo tawlhruknaa inhnamhnawih nia rinhlelhten an bei nia sawi chungchanga khaw mipui lungawi loin kawng an dannaa thleng a nih thu an tarlang.

Buaina chhuakah hian BSF pathum chuanna lirthei chu mipuiten thing leh mau hmangin an bei nia sawi a ni. Chief minister Manik Saha chuan he inbeihna hi na taka a dem thu a social media-ah tarlangin, sipaite chunga tharum thawhna thleng chu pawmzam theih a ni dawn lo tih a sawi. Pawikhawihtute chu na taka hrem an ni dawn tih a sawi bawk.

Chief Minister chuan thuneitute chu he pawikhawihnaa inhnamhnawihte lakah khauh taka hma la turin a hriattir a, venhimna kengkawhtu sipaite chuan zah an phu a ni, a ti. Police-te chuan he buaina kaihhnawihah hian, BSF leh tualchhung mite aṭanga complaint an dawn chu Kalamchoura police station-ah ziah luh a nih thu an sawi. Buaina chhuahna hmunah hian chhuizuina nei turin Sonamura sub-divisional police officer, Abhijit Das pawh a kal tawh bawk. Police-te chuan chhuizuina neih mek a nih thu leh, he buainaa inhnamhnawih zawng zawngte chhui chhuah an ni dawn tih an tarlang.