Manipur: Security force-te leh lungawi lohna lantirtute inkarah buaina chhuak

Manipur-a Kangpokpi district-ah ṭhalai pahnih rukbote ruang Senapati-a hmuh an nih hnuah, lungawi lohna lantirtute leh security force inkarah buaina nasa tak a chhuak. He buaina chhuak vang hian mipui hnawh darhna atan tear gas te an hmang tih police-te chuan nimin Thawhṭanni khan an sawi. Lungawi lohna lantirna hi Pathianni zana thleng niin, motor ke te hal a ni a, kawngpuite pawh thing leh lung hmanga dan a ni.

Lungawi lohna lantirtute chuan security force-te hi lungin an tawng bawk a, buaina chhuakah hian hliam tuar eng emw zat an awm bawk. District-ah hian buaina a chhuah chhunzawm zel avangin nimin Thawhṭanni zing khan security force dah belh a ni tih district official chuan a sawi.

Ṭhalai pahnih rukbote ruang hi Pathianni zing khan Senapati district-ah hmuh an ni. An ruang hi bag chhunga hmuh a ni a, mitthite hi T. Chongloi (21) leh Paoinlal Hangsing (20) te an ni a, October 29 khan Taphou Kuki khua aṭanga rukbo an ni.

Deputy chief minister Nemcha Kipgen leh Losii Dikho-te chuan inthahna thleng chu na taka an dem thu leh, pawikhawihtute chu chhuizuiin na taka hrem an ni dawn tih thuchhuah siamin an tarlang. Naga People's Organisation (NPO) president Kuba Peter chuan tualthahna thleng chu langtlang taka chhuizui a phut thu a sawi a, committee chuan pawikhawihtute man an nih hma chuan an ruang chu lak a ni dawn lo tih an sawi bawk.