Assam: Guwahati-a Bullet Train Northern Corridor zauhna tur pawm

Union Railway minister Ashwini Vaishnaw chuan, Guwahati-a Bullet Train Northern Corridor huang zauhna tur chu pawm a nih thu a sawi a, Assam chu ramchhunga high-speed rel network nei zingah a tel tawh dawn a ni.

Chief minister Himanta Biswa Sarma chuan corridor chu Guwahati-a huang zauh tura sorkar laipui hnenah ngenna a lo siam tawh a ni. A tira ruahmanna an siamah chuan corridor hian Delhi aṭanga Siliguri thlunzawmin, Uttar Pradesh leh Bihar kalpawh theih tura duan a ni.

Vaishnaw chuan October 31, Inrinni khan prime minister Narendra Modi-a'n Northern Bullet Train Corridor chu a pawm tih a sawi. He rel kawng hi Delhi, Agra, Kanpur, Lucknow, Ayodhya, Prayagraj, Patna leh Siliguri-te kalpawhna theihna tura tih a ni a, tunah chuan Guwahati pawh a tel ta a ni. Vaishnaw chuan high-speed rel chuan zin veivah hun chhung a titlem dawn tih a sawi a, Delhi aṭanga Kanpur kal chhung chu darkar khat leh minute 45 vel a ni dawn a, Delhi aṭanga Agra chu minute 59 a ni tawh ang. Lucknow-Varanasi pawh darkar khat leh minute 21-ah a thlen theih dawn a, Varanasi-Delhi chu darkar thum leh minute 35 vel a ni ang. Guwahati-Delhi chu darkar riat vel chhunga thlen theih a nih a rin thu CM chuan a sawi.

Corridor huang zauh hi Assam mai ni lo, hmarchhak bial mipuiten an chhawr ṭangkai thei dawn a ni. Assam leh state lian zawk tlawh pawhna awlsam zawk a awm phah dawn bawk.