Manipur: Imphal, Senapati leh Chandel-ah kawngzawh buatsaih

Manipur khawpui Imphal bakah Senapati leh Chandel-ah Inrinni khan Coordinating Committee on Manipur Integrity (COCOMI), Naga pawl leh indigenous community pawl dangte ṭangkawp huaihawtin kawngzawh buatsaih a ni. He kawngzawh hi hun rei tak chhung state-a buaina chhuak tihtawp a, leilung fate humhim tur leh, buaina avanga chenna in leh lo chhuahsan mi sang tel him taka an chenna hmuna an kir leh theihna tura sorkar laipui laka 'final call' a nih thu an sawi.

Lungawi lohna lantirtute chuan Kuki-Zo helpawlte nena Suspension of Operations (SoO) agreement siam hlih, state aṭanga Assam Rifle-te chhuah tir, National Register of Citizens (NRC) kalpui bakah state sorkar chu rintlaka awm turin an phut. Sorkar ding lai chu bang turin an phut bawk a, leilung fate venghim tawk loah an puh. He kawngzawhah hian Meitei community, Naga hnam hrang hrang 21-22 bakah pawl hrang hrang an tel.

COCOMI convenor hlui Khuraijam Athouba chuan kawngzawh chu leilung fate inlungrualna pholanna a nih thu a sawi. Sorkar laipuiin an thil phutte an tihhlawhhlin hma chuan lungawi lohna lantir chhunzawm tum a nih thu a sawi.