Manipur: Assam Rifle Chief-in Tengnoupal district tlawh

Assam Rifle director general lieutenant general, Vikas Lakhera chuan Nilaini khan Manipur-a Tengnoupal district-a Moreh leh Chongjang tlawhin, India-Myanmar ramria venhimna kalpui dan leh, ramri hungna siam mek a endik. Lakhera chuan ramri huam chhung hmun eng emaw zat tlawhin tualchhung mite nen inbiakna an nei bawk. Kakching Garrison-a sipaite inbuatsaihna kalpui dan a endik bawk.

Manipur hian Myanmar nen international ramri km 398-a thui an inṭawm a; Churachandpur, Tengnoupal, Chandel, Kamjong leh Ukhrul district-te a paltlang a ni. Ramri tam zawk hi hung loh a la nih avangin venhimna kawngah pawh harsatna an la tawk fo a ni. Ramri hung project hi state governor Ajay Kumar Bhalla chuan a lo endik tawh bawk a, Lok Bhavan-ah official-te hmuin a rang lama zo fel turin a hriattir a ni.

Chief minister Yumnam Khemchand Singh pawhin tunhnai khan New Delhi-a NITI Aayog meeting neihah ramria venhimna leh agency hrang hrangte thawh hona chungchang a sawi. Ramria harsatna thlengte sawilangin; chung zingah chuan ruihhlo tawlhruk, ralthuam tawlhruk leh mihring hralhrukna thleng ṭhinte pawh an tel. Chief Minister chuan ramri km 50 chu hung a ni tawh tih Union Ministry of Home Affairs hriattirin, km 80-ah hna thawh chhunzawm a nih thu a sawi.