Assam: Hotel-a inkahna thleng chhui turin SIT din

Assam police-te chuan Thawhlehni khan Guwahati hotel-a Thawhṭanni zana inkahna thlenga mi panga thihna chhui chianna nei turin member paruk awmna, Special Investigation Team (SIT) din a nih thu an puang. Team hi Guwahati-a police joint commissioner Ankur Jain chuan a ho dawn a ni.

He inkahnaa pawikhawihtu Ghanakanta Gogoi (34) chu man a ni tawh a, police-te chuan inkahna thlen chhan hi hotel inhmantir kaihhnawih leh enkawldan chungchanga inhnialna chhuak vang a nih thu an sawi. Thuchhuah an siamah, police-te chuan Ulubari huam chhunga Hotel Bilas-ah zan dar 9 velah silai hmeh puah thawm a awm tih thu an dawng tih an tarlang. Police-te chuan hotel hi pan nghalin, hotel reception area-ah ruang pali hmuh an ni a, mi pahnih chu hliam na tak tuara hmuh an ni bawk. Hliamte hi Gauhati Medical College and Hospital (GMCH) pan pui an ni a, pakhat zawk hi a hliam tuar loin a thi ve leh tih tarlan a ni bawk.

Police-te chuan pawikhawihtu nia rinhlelh, Ghanakanta Gogoi hi Assam-a Dibrugarh khuaa cheng a nih thu an sawi. Gogoi hi ni sarih chhung police custody-ah a awm dawn a, November 3-ah court-ah a inlan dawn a ni.