Meghalaya: HIV vei 9,244 hmuchhuak tawh

Meghalaya chief minister Conrad K Sangma chuan, state-ah HIV vei an pung zel avangin October 27 khan kum nga chhung atan special mission a puang a, he mission kalpuina tur hian Rs vbc 25 ruahman a ni. He hmalakna hi state chhunga HIV hri kai pung zel dona tur a ni a, tun dinhmunah hri vei hmuh chhuah hi mi 9,244 an awm tawh a ni.

Shillong-a State Red Ribbon Youth Festival buatsaiha thu a sawiah, Sangma chuan he natna do tur hian ṭhalaite chu ke pen chhuak tur leh, test-na huang zauh leh HIV/AIDS kaihhnawih leh ruihhlo hman sual kaihhnawiha inhmuhsitna leh in enhranna tihtawp a ṭul tih a sawi. Chief Minister chuan HIV avanga harsatna tawh mek chu Meghalaya AIDS Control Society emaw, health department-te chauh chinfel theih a nih loh thu sawiin, sorkar department hrang hrangte leh mipuiten theihtawp an chhuah a pawimawh tih a sawi.

Meghalaya AIDS Control Society leh health department bakah sorkar kutah chauh dah chuan he natna hi tihtawp theih a ni lo a, mipuite an ṭangrual a ngai tih Sangma chuan a sawi. Mitin he natna do kawngah mawhphurna an nei a ni, a ti. Sangma chuan kum nga chhung awh tur mission-ah hian hmalakna hrang hrang kalpui a ni dawn tih a sawi a, HIV test, enkawl leh awareness programme tihchak a ni dawn tih a tarlang. An hmalakna UNAIDS 95-95-95 thil tum nena inzul a nih thu sawiin, HIV vei zinga 95%-in an dinhmun an hriat theihna tura puihna tur a ni a, natna vei hmuh chhuah zinga 95% tan antiretroviral therapy (ART) pek, enkawlna dawng zinga 95% in enkawl zuina an dawn theihna tur a ni tih a tarlang.