Arunachal: CM-in MLA leh pawl aiawhte inbiakna neihpui

Arunachal Pradesh chief minister, Pema Khandu chuan Pathianni khan Siang Upper Multipurpose Project (SUMP) kalpui tur chungchangah MLA-te leh Arunachal Indigenous Tribes Forum (AITF) bakah, community-based organization (CBO) aiawhte a hranin meeting a neihpui a, ram venhimna leh chenna leilung ngaih pawimawh bakah tualchhung mite dikna chanvo humhim pawimawhnate an sawi ho.

Khandu chuan social media-a thuchhuah a siamah, all-party legislators meeting-ah hian project pre-feasibility report (PFR), ram venhimna kalpuidan tur, chenna leilung ngaih pawimawh leh Siang Valley-a mipuite thil phut chungchang an sawi ho tih a tarlang. Siang Valley mipuite dikna chanvo humhalh a, an ngaihdan zahsak chunga hamṭhatna kalpui tum a ni, a ti. AITF leh CBO aiawhte nen meeting an neihah, Chief Minister chuan project chungchangah thuthang dik lo a awm avangin mipui zingah hlauhthawnna a thlen tih a sawi. Heng thudik lo te hi langtlang leh inbiakna mumal hmanga sawifel a ṭul thu a sawi bawk.

Meeting hi MW-11,200 project chungchanga buaina nasa tak a chhuah hnua neih a ni. Adi community-a section hrang hrangte chuan project kalpui tur avanga insawnchhuah, an ram chan leh an eizawnna hloh bakah, lui ecosystem in a tuar an rin avangin lungawi lohna nasa tak an lantir a ni. Pasighat-a buaina leh tharum thawhna chhuak vangin Zirtawpni liam ta khan Siang bial chhunga Upper Siang leh East Siang district-ah darkar 12 chhung bandh huaihawt a ni a, sorkar laipui chuan venhimna kengkawh turin Pathianni khan Rapid Action Force (RAF) a tirh belh a ni. Hemi hma hian district pahnihah hian RAF company pathum dah an lo ni tawh bawk a, lungawi lohna lantirnaa buaina a chhuah hnuah Siang bial chhungah hian Central Armed Police Forces (CAPF) company 34 dah luh an ni tawh a ni.