Nagaland: SIR hnuaiah Dimapur voter list aṭangin 36,000 chuang paih

Nagaland-a Dimapur deputy commissioner leh district election officer, Tinojongshi Chang chuan Ningani khan Dimapur district-a Assembly bial pathum huam chhunga elector 36,629 chu kumin Special Intensive Revision (SIR) neihah paih an nih thu leh, draft electoral roll-a elector awm zawng zawng chu kum 2025-a 1,25,703 aṭangin 89,074-ah a tlakhniam thu a sawi.

DC office-a review meeting neihah, SIR 2026 hnuaia draft electoral roll tihchhuah chungchanga summary report a peknaah hei hi a sawi a ni. Meeting-ah hian roll ennawna kalpuinaa receipt leh pek chhuah dan, hriattirna siam leh pekchhuahna kawnga hmalaknate thlir ho a ni bawk.

Electoral Roll Observer Sotsula, IAS chuan electoral record rintlak leh langtlang taka kalpui a pawimawh thu a sawi. Official leh political party aiawhte chu harsatna an neih pawha a hnena thlen ṭhin tur leh, form sem chhuah la duh lo an awm a nih pawha finfiahna ṭha tak neih tel a pawimawh thu a hrilh.