Meghalaya: Shillong Peak ropeway project chungchangah meeting nei

Meghalaya sorkar chuan Rs vbc 151 senna tur, Shillong Peak Ropeway Project kalpui tura ruahmanna siam chungchangah stakeholder meeting a buatsaih. He ropeway hmang hian Shillong Viewpoint lar tak tlawh theihna tur thuamṭhat leh tourism kaihhnawih eizawnna tihpun tum a ni.

Meeting hi Tourism department chuan October 22 khan Meghalaya Ropeway Development Authority (MRDA) hmingin a buatsaih a ni. Tourism department commissioner leh secretary RM Kurbah chuan a kaihruai a, MRDA chief executive officer Cyril Diengdoh, sorkar department hrang hrang official-te leh Riat Laban Dorbar Pyllun member-te bakah Joint Action Committee (JAC) aiawhte an tel. Meeting-ah hian Diengdoh chuan project chipchiar taka sawina hun a hmang a, sum hman dan tur leh tualchhung mipuite tana hamṭhatna a thlen theih dan tur a sawi bawk.

Project hi New Development Bank leh PM-DevINE scheme hnuaia India sorkar fund hmanga thawh tur a ni a, a senso atan Rs vbc 151 ruahman a ni. Ropeway hi metre 913-a thui a ni dawn a, monocable gondola system hman a ni ang. Madan Laban lower terminal aṭanga Shillong Viewpoint upper terminal thleng tur hian minute 5-6 vel a awh rin a ni. Diengdoh chuan he project hi state-a khualzin tlawh tam ber pawl, Shillong Viewpoint kalna tura harsatna awm ṭhin chinfelna tura ruahman a nih thu a sawi. Tuna kawng an hmanah, Shillong Viewpoint pannaah defence ram kaltlang a ngaih avangin hun rei tak tak intlar te a ngai ṭhin a ni.