Nagaland: ADGP-in police-te mipui rinngam ni turin chah

Nagaland additional director general of police (ADGP) Renchamo P Kikon chuan, nimin October 21 khan police-te chu dikna, thiamna leh inpekna hmanga mipui rinngam ni turin a chah. Nagaland Police Headquarters-a Police Commemoration Day parade-a thu a sawiah, Kikon chuan police uniform chu mipui vantlang himna chhinchhiahna a ni chhunzawm zel tur a ni, a ti.

Police-te chu ram venhim kawnga an nunna chante chawimawi tur leh, pawikhawihna tihtawp, dan leh thupek kenkawh leh mipui tana an rawngbawlna hlen chhuak turin a fuih. Ram tana an nunna hlan police-te chu hriatreng an ni dawn tih sawiin, an chhungte a tawrhpui thu a sawi bawk.

Police Commemoration Day hi kumtin October 21-ah hman ṭhin a ni a, kum 1959-a Ladakh-a Hot Springs-a China sipaite nen an inkahnaa thite chawimawina hun atan hman ṭhin a ni. Deputy central intelligence officer, Karam Singh kaihhruai police search party, member 20 awmna chuan an thawhpui chin hriat loha awmte zawn beihpui an thlak a, hemi ṭuma China sipaite nena inkahnaah hian mi 10 an thi a ni.