BJP Arunachal Unit-in SIR thlawp

BJP Arunachal Pradesh unit chuan voter record dik tak siam a nih theihna atana electoral roll ennawnna kalpui mek, Special Intensive Revision (SIR) chu an thlawp tih an sawi. An state chu hnam hrang hrang awmna a ni a, hei vang hian SIR chu state pawn lam mite tihbuai theihna tur lak aṭanga invenna leh, hun lo awm tura ram leh nihna chungchanga inhnialna awm tur venna atan a pawimawh niin an sawi a ni.

East Kameng district-a party meeting-a thu a sawiah, BJP Arunachal general secretary Tadar Niglar chuan SIR chungchang sawilangin, inthlan kalpui dan dikna humhim turin voter list dik taka siam a pawimawh a ni, a ti. Electoral roll siamṭhat chu ruahmanna felfai taka kalpui a nih thu leh, SIR verification, langtlang leh voter-te tana final electoral roll tihchhuah hmaa siamṭhat theihna hun remchang siam a pawimawhzia a tilang tih a sawi bawk.

Niglar chuan SIR kalpui dan duh loha Cockroach Janata Party (CJP) leh INDIA bloc-te nawrh huaihawt chu sawiselin, eptu pawlte chuan electoral roll ennawnna chu ṭha taka kalpui aiin, ramchhunga politics lama buaina leh rorelna mumal awm lo siam an tum niin a puh. An thiltih chu politics lama an lungawi lohna a nih thu leh, nawrh huaihawt leh buaina hmanga politics hman ṭangkai tumnaah a puh bawk a ni. Electoral roll siamṭhatin a tum ber chu India khua leh tui dik tak ziah luh an nih theihna tur leh, electoral roll-a khua leh tui ni lo an awm lohna tur a nih thu a sawi a, hemi rual hian voter dik takte dikna chanvo humhalh a pawimawh a ni, a ti.