Opium chinna hmun acre 3,000 tihchhiat a ni tawh: Manipur CM

Manipur chief minister Yumnam Khemchand Singh chuan October 19 khan opium chinna hmun acre 3,000 vel tihchhiat a nih tawh thu leh, Narcotic Drugs and Psychotropic Substances (NDPS) Act hnuaiah thubuai 307 ziah luh a nih tawh bakah, state-ah ruihhlo tawlhru ṭhin mi 467 man an ni tawh tih a sawi.

Imphal-a 1st Battalion Manipur Rifles Parade Ground-a Manipur police 135th Raising Day-a thu a sawiah, Chief Minister chuan sorkarin opium chinna hmuh tihchhiat leh ruihhlo tawlhruk tihtawp kawngah hma a la chhunzawm zel dawn tih a sawi. He hunah hian Churachandpur-a 1st Indian Reserve Battalion (IRB) commandant, Paukhanmung Guite chu parade commander a ni. Guite hi kum 2023 May thlaa state-a hnam leh hnam inkara buaina a chhuah aṭanga Imphal-a Kuki-Zo community aṭanga police officer parade kaihruai hmasa ber a ni.

Chief Minister chuan sorkarin ruihhlo do kawnga a hmalakna, 'War on Drugs' campaign sawilangin, dan loa opium chin leh, ruihhlo tawlhruk titawp turin theihtawp a chhuah zel dawn tih a sawi. Police leh agency dangte chuan state-a ruihhlo tawlhruk dan dinhmun an chhui zui reng thu leh, state puma ruihhlo network tichhe tura an hmalakna leh inpeknate a sawi bawk.