Manipur: Civil service, NEET leh JEE coaching scheme atan Rs vbc 4 ruahman

Manipur sorkar chuan civil service lama tuimite tan, sum hmanga ṭanpuina pek a nih tur thu leh, medical leh engineering entrance exam atana inbuatsaih zirlaite tan a thlawna coaching pek a nih tur thu a puang. Hemi atan hian Rs vbc 4 a ruahman.

Chief minister Yumnam Khemchand Singh chuan Ningani khan civil sevice lama tui mi 400-te chuan Chief Minister Scholarship Scheme hnuaiah coaching support an dawng dawn tih a sawi. Sorkar chuan scholarship atan Rs vbc 2.80 a dah a, Rs vbc 1.2 chu ALS IAS Corporate Social responsibility (CSR) hmalakna kaltlanga pek chhuah a ni bawk ang. Candidate-te chuan kumin October 25 thleng hian screening test an ti thei dawn a, November 1-ah neih tur a ni.

State sorkar chuan tun hnai khan coaching institute-te nen Memorandum of Understanding (MoU) pahnih an lo ziak tawh a, hemi hmang hian zirlaite chu Coaching Scheme for Entrance Examination to Professional Course-a medical leh engineering entrance exam an hmachhawn turah training a pe dawn a ni. MoU hi chief minister hlui N. Biren Singh hriatpuinaa ziah a ni a, school education director Laishram Nandakumar Singh chuan sorkar aiawhin a ziak a ni. He hunah hian Aakash Educational Services Limited aiawhin Deputy National Academics Director Sarvesh Chaubey a tel a, FIITJEE Limited aiawhin National Head of Admissions Samir Kumar a tel bawk.