Assam: Yaba tablet Rs vbc 57.5 hu man

Assam police-te chuan Yaba tablet nuai 2.3, Rs vbc 57.5 man hu chu Cachar district-a Udharbond huam chhunga Nagaland registration number nei truck pakhatah an man a, he thil kaihhnawihah hian mi pahnih man an ni bawk.

Cachar police superintendent Partha Protim Das chuan Ningani kha thuthar lakhawmtute kawmin, thla hnih aṭanga thla thum liam taa an thudawn bawhzuiin Udharbond police station hnuai, Panch Mile huam chhunga Udharbond bypass-a endik beihpui an thlaknaa man a nih thu a sawi.

Cachar district-a Assam police-ten ṭum khata ruihhlo an man tam ber a nih thu sawiin, mi pahnih an mante hi Uttar Pradesh-a Firozabad mi leh Madhya Pradesh-a Gwalior mi an ni tih SP chuan a sawi bawk. Das chuan heng ruihhlote hi truck chhunga secret chamber-ah hmuh chhuah a nih thu sawiin, khawi hmun nge thlenpui an tum tih leh, interstate-a ruihhlo tawlhruknaa inhnamhnawihte chhuizuina neih nghal a ni tih a tarlang.

Investigator-te chuan sum inthawndan leh, tablet chu khawi hmun aṭanga lak nge tih bakah a a bultumtu an chhui mek. Police-te chuan beihpui thlaknaah hian ruihhlote hi a thlenna hmun tur a thlen hmaa hma lak nghal a nih thu an sawi. Thla khat liam ta khan Cachar police-te hian heroin leh Yaba tablet nia rinhlelh, Rs vbc 14 man chu hmun hniha beihpui an thlaknaah an lo man tawh bawk.