Meghalaya: Motorcaravan scheme vailiam

Meghalaya sorkar chuan tourism sector hrang hrang hmasawnna tur hrang hrang a kalpui mek a, tourism entrepreneur-te tan motorcaravan scheme siamin, Shillong-a Ward's Lake visitor facility tihchangtlun a nih bakah Meghalaya Tourism Development Corporation (MTDC) chuan tourist bus thar an nei bawk.

Chief minister Conrad K. Sangma leh tourism minister, Timothy D. Shira-te kaihhruaina hnuaia hmalaknate hian state-a tourism hmasawnna zau zawka kalpui leh, khualzinte tana hmanrua tihchangtlun, tualchhung sumdawngte tana hun remchang siamsak a tum a ni. Chief Minister ELEVATE Programme zinga mi, Meghalaya Motorcaravan Scheme hnuaia PRIME Meghalaya Motorcaravan vailiam a ni a, he scheme hi tourism entrepreneurship thuam chakna tur a ni a, entrepreneur-te chu motorcaravan hmanga eizawnna an neih theihna tura puih a tum a ni.

He scheme hnuaia diltute chuan project senso 50% huam tur sum lama ṭanpuina an dawng thei a ni. He ṭanpuina hi hmalakna tihpuitlinna tura sum lama harsatna awm tihziaawmna tur leh, bank kaltlanga credit hmuh theihna tihchangtlunna tura ruahman a ni. State ramngaw, tuikhawhthla, lui kam leh hmun mawi tak takah motorcaravan tourism kalpui theihna hun remchang a siamsak thei bawk ang.