Manipur: Inter-state codeine syrup network nia rinhlelh man chhuak

Manipur police-te chuan Imphal-a damdawi dawr neitu, codeine-based cough syrup dan loa zawrh leh sem chhuahnaa inhnamhnawih nia sawi, inter-state network nia rinhlelh chu an man a, beihpui an thlaknaah khuh damdawi bottle 8,638 an hmuchhuak tih official-te chuan an sawi.

He thila a bultumtu Nongthombam Jamesjit Thoi tiha hriat, Imphal West-a Naoremthong Bazar-a Kangla Drugs & Surgical Pharmacy neitu chu Gujarat-a Ahmedabad-ah October 6 khan man a ni. Thoi hi Manipur-ah hruai kir a ni a, investigator-te chuan thu zawhfiah a nih theih nan court aṭangin ni li chhung transit remand an hmu a ni.

October 4-a Imphal East-a an thudawn bawhzuia anti-narcotics operation neih a ni a, CRPF, CDO/Imphal East Unit-a Anti-Narcotics Task Force/Imphal East, M&N Sector leh Range Imphal QAT leh Youth Against Drug and Alcohol Manipur (YADAM) member-te chuan Ningthem Pukhri Mapal huam chhung leh Singjamei Mayengbam Leikai an dap a ni. He beihpui thlaknaah hian khuh damdawi, Codeine Phosphate kawltu mi pathum an man.

Police-te chuan an kut aṭangin CHOCO+ cough syrup bottle 318 an man a, bottle khatah hian Codeine Phosphate mg 10 a awm tih an sawi. Hei bakah Mahindra XUV, TVS Jupiter scooter leh mobile phone pathum an man bawk. Porompat Police Station-ah thubuai ziah luh a ni a, hemi hnuah investigator-te chuan supply chain nia rinhlelh chhuizuina an nei bawk.