Tripura: Ayurvedic medical college dinna tur pawm

National Commission for Indian System of Medicine (NCISM) chuan Tripura-a Gomati district-ah, sorkar Ayurvedic medical college and hospital dinna tur a pawm tih chief minister Manik Saha chuan October 7 khan a sawi. CM hian he thu hi Renters Colony, Agartala-a Tripura Government Homeopathic Medical College and Netaji Subhash Homeopathic Hospital a hawnnaah a sawi a ni.

Tripura Government Ayurvedic Medical College and Hospital chu Tepania-ah din a ni dawn a, kumtin undergraduate course-ah zirlai 60 vel lak an ni dawn tih Saha chuan a sawi bawk.

Medical college chu hman ṭan a nih hunah, mipuite chuan state chhungah Ayurvedic health service awlsam takin an dawng thei tawh dawn tih Chief Minister chuan a social media post-ah a tarlang. Prime minister Narendra Modi leh State for AYUSH (Independent Charge) union minister, Prataprao Jadhav-te chungah lawmthu a sawi a, he institution hian Tripura-ah Ayurvedic healthcare leh medical lam zirna a tichak dawn a ni, a ti.

Tripura Government Ayurvedic Medical College and Hospital din tura pawmpuina hi National Medical Commission-in Agartala Government Medical College (AGMC)-a MBBS seat 100-a tihpun tura rawtna a pawm hnuah siam a ni a, hemi hmang hian state chhungah medical education zir theihna huang nasa takin a zauh thei dawn a ni.