Arunachal: Hmeichhia leh naupang thuam chakna tura sorkar laipui thlawpna ngen

Arunachal Pradesh Women and Child Development minister, Dasanglu Pul chuan state chhunga hmeichhiate tihchakna, naupang venhim, ei leh in bakah naupang enkawlna lama hmalaknate tihchakna turin sorkar laipui aṭanga thlawpna chak zawk a ngen.

Pul chuan October 6-a New Delhi-a union women and child development minister, Annapurna Devi nen inbiakna an neihah welfare scheme awmsa tihchak, hmeichhia puitling leh tleirawlte tana hun remchang ṭha zawk siamsak, venhimna, hamṭhatna leh thuam chakna pekna tur system siam ṭhat chungchangte a sawi. Nimin Nilainia official-a thuchhuah a siamah, Pul chuan Union Minister chu hmeichhia leh naupangte hamṭhatna tihchangtlunna tura hmalakna hrang hrangah, state chu a ṭul dan ang zela thlawpna pe turin a ngen a ni.

Minister chuan welfare scheme hrang hrang, a bulṭhut aṭanga hamṭhatna dawngtute hnen a thlen theihna tura state sorkar hmalaknate a sawilang bawk. Khawtlang tana rawngbawlna pawimawh pek chhuah kawnga mawhphurtu anganwadi hnathawktu, helper-te leh ASHA worker-te puihna tura hmalaknate avangin sorkar laipui chungah lawmthu a sawi. Tun hnaia Arunachal Pradesh-a anganwadi worker-te leh ASHA didi-te tana Agan Milan Sewa Sammelan buatsaih a ni chu lawmawm a tih thu sawiin, hmeichhia leh naupangte hamṭhatna service pek chhuah kawnga frontline worker-te thawhhlawkzia a sawilang bawk.